आवअ लवट चलीं गाँव के ओर

[R. K. PANDEY "RAJ"]

गोईठा-लकड़ी के चूल्हा में

भाप उठत ऊ भात बोलावे,

संक्रांति के दही-चुड़ा-तिलवा 

कऊड़ा में के आग बोलावे,

बहुत हो गईल शहर में रहल

आवअ लवट चलीं गाँव के ओर..

 

रेंहट के ऊ चूं-चूं-चूं-चूं पुकारे 

गौशाला के गाये-बैल रम्भाये,

पम्पिंग सेट के फट-फट-फट

रही-रही के आपन बैन सुनावे,

चांपाकल से निकलल पानी के

शुद्धता आ मिठास बोलावे,

बहुत पी लिहनी मिनरल वाटर

आवअ लवट चलीं गाँव के ओर...

 

ड्योढ़ी दलान आ दुआर पुकारे

गोबर से लिपल अंगना पुकारे,

खेत-खरिहान आ डीह बोलावे

बगईचा में के पपीहा बोलावे,

ठकुरबाड़ी के घरी-घंट पुकारे

किल्ली, कुण्डी, पीढ़ा पुकारे,

बहुत घूम लिहनी अब मॉल में

आवअ लवट चलीं गाँव के ओर...

 

इयार-दोस्त सब राह निहारे

कब अईबअ ? रह-रह उचारे,

संकरांत के दही-चुड़ा बोलावे 

होली के पुआ आ बाड़ा बोलावे,

फुलहा कटोरा में के दूध पुकारे

पिट्ठा-छांछी-ढक्नेसर भी पुकारे,

बहुत खा लिहनी अब चाईनीज

आवअ लवट चलीं गाँव के ओर...

 

ऊ मदमस्त पुरवईया बयार पुकारे

नदी में के ऊ झक-झक धार पुकारे,

सोन्ह-सोन्ह माटी के महक बोलावे

लहलह करत खेत आ डीह बोलावे,

सुना पड़ल ऊ देवताघर बाट निहारे 

गाँव में बीतल बचपन रह निहारे,

बहुत घूम लिहनी हम देश-दुनिया

आवअ लवट चलीं गाँव के ओर... .

 

• आर के पाण्डेय 'राज' , पटना/लखनऊ

 

[Abhinav Arun]

आदरणीय श्री पाण्डेय जी आपकी इस रचना ने गाँव की सचमुच याद दिला दी |  भाव - भाषा और शिल्प सभी में नयापन है बहुत खूब सशक्त रचना !! हार्दिक बधाई !!

[Er. Ganesh Jee "Bagi"]

राज भाई, राउर इ रचना गाँव के दृश्य आँख के सामने ला दिहलस, माटी के कराही में जमावल लाल साढ़ी के दही इ शहर में कहाँ भेटाई ? कुछ त बात जरुर बा जे गाँव चूमक लेखा खिचे ला, बहुत ही बेजोड़ रचना, बधाई स्वीकार करी |

[Saurabh Pandey]

’माटी के कड़ाही में जमावल दही के लाल साढ़ी’ !! .. ई मात ह मात.. !!!

का इयाद परा दिहलऽ, ए गणेश भाई .. !!!! ..  जिभिया लरातिया ..  :-))))

 

[Er. Ganesh Jee "Bagi"]

सांच कहत बानी रौआ, गोइठा पर के अउटल सोन्ह भईसी के दूध के दही आ ओकर साढ़ी आय हाय हाय ....भेटाइल इ शहर में मुश्किल बा भाई, मुंह भर गइल .......लार से अउर कईसे :-))))))))))

[Saurabh Pandey]

:-)))))))) 

भाई आरके पाण्डेय ’राज’ जी के एह गीते के ई असर ह, गणेशभाई जी.  :-)))))))))))

 

[Shubhranshu Pandey]

 बंसखट पर लेट के, डोलावल बेना के हवा जस राउर ई रचना आनन्द देता..... बहुत आनन्द आ गइल......

[Saurabh Pandey]

आहियाहि !! ... :-))))

 

[Er. Ganesh Jee "Bagi"]

गज़ब के... . बेजोड़ जोड़ लगवनी शुभ्रांशु भाई |

[Saurabh Pandey]

भाई आरके पाण्डेय ’राज’ जी, राउर एह गीत पर मन दुलकी मरले ओह बगइचा में चहुँप गइल जवना के एक किनारे इनार रहुए आ ओही से सटल एगो रहे शिवाला. जवना के चउतरा पर हमनी के लोटाइल फिरीं जा. 

आपन दुआर, आपन डीह, आपन माटी हाल्दे केहू ओरियावे ना, भलहीं दुर-परोजन कवनो होखो.  जीवन के सांझ होत ना होत पंछी घुरियाइल अपना डाढ़ि के ओही घोंसला में चलि आवेला.  जवन, अइसन ना भइल त जरूरे कवनो बड़हन फेरा होखी, ई बूझाला. ओइसना पंछियन के गोहिरावत राउर गीत (रचना) बोल-फुहार के टाँसी मारत मरुआइल हिरदा पर मरहम लगा रहल बा.  एह रेघार में बड़हन दर्द बा ए भाईजी.

बहुत-बहुत बधाई आ हमार हार्दिक शुभकामना स्वीकार करीं.

 

[R. K. PANDEY "RAJ"]

गणेश जी भाई, अरुण भाई, सौरभ भाई, शुभ्रांशु भाई.......अपने सभे के हमार प्रणाम आ हमार एह छोटहन रचना पर राउर सभे के प्रेरणात्मक आ उत्साहवर्धक प्रतिक्रिया खातिर रउवा सभे के कोटिशः धन्यवाद आ आभार व्यक्त कर रहल बानी. 

गणेश जी भाई, अपने त हमार रचना के साथ में गाँव के चुल्हानी के फोटो लगा के हमार रचना के स्वर्ण आभूषण प्रदान कर देनी. हमार रचना में जीवन्तता आ गईल. 

कहल बा की जब दिल के दरद आवाज ना बन के शब्द बन जाला, तब कविता के शक्ल अख्तियार करके आपन हाल कुहुंक-कुहुंक के सुनावेला. काल्ह मकर संक्रांति ह आ एह अवसर पर गाँव में बीतल बचपन के दिन इयाद आ गईल. हमार ई रचना ऊहे कुहुंकत मन के अभिवक्ति ह.........अउर का कहीं ?

राउर भाई

आर के पाण्डेय 'राज'

पटना/लखनऊ

[Neelam Upadhyaya]

माटी के कड़ाही में जमावल दही के संगे अगर ओखर मे तुरंते के कुटाइल गरम गरम चिऊरा के बात ना होखे त  बुझाई  कुछऊ छूटल जाता .