"OBO लाइव विश्व भोजपुरी कवि सम्मेलन" (Now Close)

[Er. Ganesh Jee "Bagi"]

भोजपुरी साहित्य प्रेमी लोगन के सादर परनाम,
ओपन बुक्स ऑनलाइन परिवार पिछला कई महिना से हर महीने सफलता पूर्वक "OBO लाइव मुशायरा" अउर "OBO लाइव महा इवेंट" के आयोजन कर रहल बा, एह सफलता से उत्साहित होके रउआ लोगन खातिर एगो अउर अनूठा अउर अपना तरह के अंतरजाल पर एकलउता लाइव कार्यक्रम ले के आवत बा जेकर नाम बा "OBO लाइव विश्व भोजपुरी कवि सम्मेलन" एह कवि सम्मेलन मे विश्व के कोना कोना मे बईठल भाई, बहिन लोग भाग ले सकत बा अउर आपन भोजपुरी रचना के प्रस्तुति लाइव कर सकत बा साथ मे प्रस्तुति पर आपन टिप्पणी भी दे सकत बा लोगन |
कार्यक्रम के रूप रेखा :-
कार्यक्रम प्रारंभ  :- दिनांक १२, फरवरी दिन शनिवार
कार्यक्रम समाप्त :- दिनांक १३, फरवरी दिन रविवार 
नियम :-
१- रचना भोजपुरी मे ही होखे के चाही |
२- रचना अइसन होखे के चाही जेके आपन परिवार मे माई बहिन के साथ पढ़ आ सुन सकल जाव |
३- रचना पहिले से कवनो वेब साईट चाहे ब्लॉग पर पहिले से प्रकाशित ना होखे के चाही, अगर कवनो प्रिंट माध्यम मे प्रकाशित बा तब वोह रचना के प्रस्तुति के अनुमति बा |
४- रचना मौलिक माने आपन लिखल होखे के चाही कोई अउर के ना, एगो कवि आपन प्रस्तुति एक से अधिक बार दे सकत बाडन, बस ध्यान इहे रखे के बा की रचना के स्तर बनल रहे माने quantity के चक्कर मे Quality ख़राब न हो जाय |
५- अबही Reply बॉक्स बंद रही जवन ठीक कार्यक्रम प्रारंभ यानी की १२ तारीख लागते खोल दिहल जाई अउर १३ तारीख ख़तम भईला पर बंद कर देवल जाई |
६- अगर रउआ कवनो कारण से आपन रचना समय से पोस्ट करे मे असमर्थ बानी त आपन रचना इ-मेल [e-mail] पर भेज दिही | राउर रचना एडमिन OBO द्वारा राउर नाम से पोस्ट कर देवल जाई, वईसे कोशिश करी की रउआ अपने से पोस्ट कर दिही |
७- रउआ अगर अबही ले ओपन बुक्स ऑनलाइन परिवार से नईखी जुडल त www.openbooksonline.com पर जाके sign up कर के OBO के मुफ्त सदस्यता ले लिही फिर भोजपुरी साहित्य समूह के ज्वाइन कर लिही |
८- अधिक जानकारी खातिर रउआ हमर इ-मेल ganesh3jee@gmail या मोबाइल नंबर ०९४३१२८८४०५ चाहे एडमिन OBO के इ-मेल [e-mail] पर संपर्क कर सकत बानी |

राउर आपन ही
गनेश जी "बागी"    

[आशीष यादव]

बड़ा सुघर  गीत , संयोग  श्रींगार के बढ़िया कहानी|

[Rajeev Kumar Pandey]

गर्व से सारा दुनिया में भोजपुरिया कहावल जाव ...... 

---------------------------------------------------------------------------

जय  भोजपुरी जय भोजपुरिया,सबके हम  बोलावत  बानी ,  

स्वर्णिम  बा इतिहास आपन ई सबका के  बतावत बानी ,

 

 नालंदा के  धरती  के पुकार  आज  रऊआ सबके  सुनावत  बानी,    

बाबा   गोरखनाथ के   बुलावा आज सबके हम   सुनावत  बानी,  

  

लखनऊ के शाम से लेके,पटना के भी नाम के लेके ,

मारीशस के धरती पर बानी या बीजी बानी दुबई में कौनो काम  के  लेके ,  

 

सबके आज हम नेवता एक पेठावत बानी ,

भोजपुरिया धरती के एक निमंत्रण सबके हम पहुँचावत  बानी ,

  

एह धरती के जन्म के रऊआ एगो कर्ज   चुका दीं

आज रऊआ भोजपुरी पे आइल कलंकित आंच  बुझा दीं ,

  

 भोजपुरी के जे बा दुश्मन  ओकरा के रऊआ आज बता दीं

आज रऊआ माँ समान एह भाषा के लाज बचा दीं ,

  

 आरा और छपरा से होके , बलिया और चंपारण लेके 

बेतिया , बक्सर , पडरौना से , सब ओर से कौनो कारण लेके ,

 

सबके साथ- साथ में आज आगे आवे के होई

धन, धर्मं जाति के बंधन आज सबके मिटावेके होई ,

    

कब तक राजेंद्र बाबु धरती के लाल सुतल रहिहें ?

कब तक  वीर   कुवंर के धरती के सपूत सुतल रहिहें ?

  

 अभी  जिन्दा बानी जा ऐ भोजपुरिया माटी के सपूत आज सबके बतावे के बा,

हर गलत  ऊँगली जवन  उठल  बा ऐ संस्कृति पर सबके काट   गिरावे के बा ,

  

 आज भिखारी ठाकुर के भोजपुरी के लाज बचावे के बा,

आज सारा विश्व के भोजपुरिया के एक साथ कदम बढ़ावे के बा,

 

जे गोपालगंज , सिवान , छपरा से बा, ओकरो आगे आवे के होई

लुधियाना,  दिल्ली  , सूरत और मुंबई  से भी लोग के बुलावे के होई .

  

केहू मजदुर बा त केहू आई एस आफिसर बा ,

केहू  इंजिनियर त केहू वेल्डर ,  केहू फीटर बा

 

 आज सबका एक साथ कदम मिला के चले के परी ,

अपना संस्कृति के खातिर सबके साथ आज निकले  के परी ,

  

कब अक हमनी के माई- बहिन अपना कान पर हाथ  रखिहें ?

कब तक भोजपुरी के तरफ सब लोग नफरत से तकिहें ?

  

कब तक   द्विअर्थी गीतन पर नंगा नाच चलत रही ?

कब तक लोग अपना के बिहार आ यु पी  के कहला से बचत रही  ?

  

डाक्टर बानी , इंजिनियर बानी और रऊआ आई एस ऑफिसर बानी

रऊआ भी ऐ धरती के लाल बानी रऊआ नाही दुसर तीसर बानी.

 

आई सब लोग मिल के दुनिया के दिखावल  जाव

थोडा सा सुतल रहनी जा जरूर, मरल नाही, ई सबके सिखावल  जाव ,

 

आंख निकाल लियाई , हाथ काट दिहल जाई अगर इरादा नापाक होई,

 एक बार फिर से हमरा ऐ भोजपुरी धरती माई के आँचल साफ होई ,

  

सब लोग आयीं एक साथ मिलके प्रेम के दीपक जलावल जाव

जय भोजपुरी ,जय भोजपुरी के नारा लगावल जाव

भोजपुरी संस्कृति के प्रति आपन सर झुकावल जाव

गर्व से सारा दुनिया में भोजपुरिया कहावल जाव ......  

 

राजीव कुमार  पाण्डेय

[Er. Ganesh Jee "Bagi"]

आँख खोले वाला अउर सुतल लोगन के जगावे वाला इ गीत बा राउर , बेहद खुबसूरत कथन से परिपूर्ण अउर खून में उबाल लावे मे समर्थ बा इ रचना ,

कब अक हमनी के माई- बहिन अपना कान पर हाथ  रखिहें ?

कब तक भोजपुरी के तरफ सब लोग नफरत से तकिहें ?

बहुत बरियार रउआ बात उठवले बानी , सब भोजपुरिया लोग के विचार करे के पड़ी आ अश्लील फिलिम अउर गीतन के विरोध अउर बहिष्कार करे के पड़ी |

आज भोजपुरी पर लोग आँख नाक सिकोड़ेला कारण इहे अश्लीलता बा , इ कोढ़ के निकाल बाहर कईला के जरूरत बा , हमनी के ओपन बुक्स ऑनलाइन परिवार कबो अइसन कुल चीजन के प्रश्रय ना देहनी जा अउर ना देवल जाई |

बहुत ही बरियार प्रस्तुति बा इ राउर , बधाई स्वीकार करी |

प्रणाम भोजपुरी

[आशीष यादव]

राजीव भैया, एकदम झाकाश बात लिखलें बानी|  बहुत सुन्दर रचना आ एकदम उत्साह से लबालब भरल बा|
इहे ना भैया आप जेवन भिज्पुरी के बिगरत बाडन सन उन्हानो के सचेत कईले बानी|

कब तक   द्विअर्थी गीतन पर नंगा नाच चलत रही ?

कब तक लोग अपना के बिहार आ यु पी  के कहला से बचत रही  ?

एह बात पर त हमहू राउर साथे बानी की

आंख निकाल लियाई , हाथ काट दिहल जाई अगर इरादा नापाक होई,

 एक बार फिर से हमरा ऐ भोजपुरी धरती माई के आँचल साफ होई ,

जबरदस्त रचना खातिर बधाई देत बानी|

[Rajeev Kumar Pandey]

hridya se dhnywaadi bani bhiaya hum raur

[आशीष यादव]

काहें लागल तोहसे सनेह, ए गोरी एह पापी संसार में|

हमनी के प्यार के न बुझलस ज़माना,
बाड़े जवन प्यार के हो दुश्मन पुराना|-
उडी परान छोड़ के देह, ए गोरी एह पापी संसार में|
काहें लागल तोहसे सनेह, ए गोरी एह पापी संसार में|

धधक-धधक जाले हियरा के अगिया,
जब याद आवे हमके तोहरो सुरतिया|-
आतमा हो जाले विदेह, ए गोरी एह पापी संसार में|
काहें लागल तोहसे सनेह, ए गोरी एह पापी संसार में|

कईसे के दिहल तोहार चिट्ठी जरा दीं,
जा के कईसे दरिया में फोटो बहा दीं|-
कईसे मिटा दीं तोहसे नेह, ए गोरी एह पापी संसार में|
काहें लागल तोहसे सनेह, ए गोरी एह पापी संसार में|

भलहीं तू हमके न दिल से भुलईहा,
बाकी अपना सजना के घरवा सजईहा|-
रखिहा लगा के उनसे नेह, ए गोरी एह पापी संसार में|
काहें लागल तोहसे सनेह, ए गोरी एह पापी संसार में|

आशीष यादव
लखनऊ,गाजीपुर

[Er. Ganesh Jee "Bagi"]

वोहो का बात बा आशीष, बहुत तगड़ा रचना ,

भलहीं तू हमके न दिल से भुलईहा,
बाकी अपना सजना के घरवा सजईहा|-
रखिहा लगा के उनसे नेह, ए गोरी एह पापी संसार में |

 

एही के कहल जाला त्याग, अउर त्याग के ही दोसर नाव ह सच्चा प्यार, बेहद खुबसूरत रचना अउर ओतना ही बरियार सनेस , बहुत बहुत धन्यवाद बा एह प्रस्तुति पर अउर हमार बधाई स्वीकार करी , साथ में हमार आशीर्वाद बा की राउर लेखनी ऐसही चलत रहो |

जय हो , प्रणाम भोजपुरी !

[आशीष यादव]

ई त आप लोगन के आशीष के फल बा की हम "आशीष" कुछ लिख लेत बानी| आप लोग आपन नेह बना के रखी हमार ऊपर|
राउर के हमार  रचना पसंद आइल हम धन्य हो गईलिन|

[Rajeev Kumar Pandey]

हम ना आएब :- भगवान के कथन

हम ना आएब ,
आखिर काहें आएब हम ,
केकरा-केकरा के समझायेब हम,
केकरा के न्याय के बात बताएब हम,
केकरा के शांति के पाठ पढायेब हम,

दू भाई के तांडव नृत्य
देखत रही जाएब हम ,
का एही खातिर आएब हम ,
केकर शांति दूत बन के जाएब
का भगवान वाला आपन छवि
खुद बचा पाएब हम ???

हम कौना-कौना रावण के मार गिरायेब
कौना- कौना कंस के मौत के नींद सुलायेब ?
अब शांति संदेस कहाँ सुनायेब ?
कौना कौना दुर्योधन के पास जाएब ?
का खुद बिना स्वार्थ के रह पाएब ????

जब चारू ओर हो रहल होखे चीर हरन ,
पुकारत होखसन द्रौपदी सब ,
हम कौना-कौना कौरव दरबार में जाएब ,
केकर केकर लाज बचायेब हम ,
जब चारो ओर मचल बा चीख पुकार,
का कौनो द्रौपदी के पुकार सुन पाएब हम ,

आखिर इतना वस्त्र -वसन कहा से लायेब हम ,
बहिर- गूंगा दर्शक बन के देखत रही जाएब हम ,
एहिसे सोचतानी नाही आएब हम ,
काहे से कि लूटत-बिलखत ऐ मानवता के ,
बचा ना पाएब हम , हाँ बचा ना पाएब हम ..

राजीव कुमार पाण्डेय
गोपालगंज , बिहार

[आशीष यादव]

raajiv bhaiya aaj ki samaaj aa kukarm pe bhagwaan ke muh se bolwaawal kathan aap ke bilkul sahi ba|

rachna sunder banal ba|

badhai swikaari.

[Er. Ganesh Jee "Bagi"]

बहुत ही बरियार रचना , हमरा लागत बा की अब तक कवि सम्मेलन में पढ़ल गईल कुल प्रस्तुति में सबसे बेहतरीन प्रस्तुति | भगवान भी डेरा गईलन एह कलयुग में , जय हो प्रभु , कईसे अब इ नईया पार होई |

बहुत बहुत बधाई एह बरियार रचना खातिर |  

[Rajeev Kumar Pandey]

रऊआ काहे इतना गुरुर में रहीले

रऊआ काहे इतना गुरुर में रहीले
जब हम जागिले परेसान होके,

रऊआ चैन से सोइले
पर इ जान लीं कि कुछ लोग बा,

जे हमके पावे खातिर,

आपन सारा नींद खोवेला.
हमार एक झलक पावे खातिर,

उ दिन रात रोवेला,
कही अईसन ना होके जे,

हम हमेसा खातिर अब चैन से सो जायीं
और रऊआ सारी उमर खातिर,

बेचैन से हो जायीं .........